Hampi

Miar sind im boulderparadies und hend schu nochem erschta halba klettertag kai hut und kai kraft meh :-) Isch aber au a guata ort zums gmüatli näh...

Dr tempelelefant muas suber si fürd zeremonie wo 2xtäglich abghalta wird

Üsara neui "beschti fründ".  Er isch babu ima klina tempel do und het nit wella begrifa wia miar schu so lang zäma sind und no immer kai kinder uma sind. Het grad wella wüssa ob miar denn nit ...   Er isch jetz sicher am beta für üs.

Back in india

Miar hend schlussendlich üsers india visa kriagt und beschlossa mit bus und zug as rechts stuck richtig süda z reisa. Z grossa ziel isch hampi, das buldergebiat in india. Üseri erscht etappa isch aber zersch uf lumbini, gorakhpur und vu det in knapp 40 stund im zug uf mumbai. Vorallem d zugreis isch wiederamol as erlebnis gsi. Will alles usbuacht gsi isch hemer nu sleeper class (dia 2. billigscht vu öpa 5 verschidana klassa) tickets kriagt. Natürli, typisch indisch, völlig überfüllt, mindestens dopplet überbuacht. Miar als dia einziga touris, hend as eignigs bett kriagt. Ringsum hends better müassa teila oder am boda und im gang liga. Bilder sind das gsi... und trotzdem guati stimmig. Und d tee- und essensverkäufer hends doch no duragschafft und hend im minutatakt ihri war lutstark abota... Leider gits vur zugreis kai fötali, aber iar könds eu sicher vorstella.

Immer wieder fasziniarend wia do so a grenza funktioniart. Dr grenzübergang nepal india in sunauli.

Üsers "Gateway to india"

...und z offiziella "Gateway to india", wo si dazumal für da englisch könig baut hend.

Sunnauntergang am strand in mumbai.

D wäscherei vu mumbai.

pokhara, kathmandu, bhaktapur

Sit üsem trek hemer a kurza trip uf pokhara und bhaktapur gmacht und snd vorallem am essa, trinka und umahänga gsi. Wartend ufs india visa. Den gots ab richtig süda...

Do as paar fötali vu da letschta täg.

Pokhara. Wieder a chli wia bi üs. Dr annapurna wo hina füra luagt isch aber grad a chli höher als üsi berga.

wia in da feria :-)

A hufa tempel in bhaktapur

As rockkonzert zmizt in da alta tempel vu bhaktapur

 Swayambhunath

Akrobatischi ilaga zum a chli öpis z trinka z kriaga

Everest trek teil 2: lukla - renjo la - cho la - basecamp...

Ab lukla isches recht bevölkeret worda. Dr everest highway heisst nit wega nüt a so. Miar sind da hufa lüt a chli usgwicha und hend dr 2 pässetrek gmacht (dr dritti pass hemmer den nüm möga macha). Vu namche uf thame, über da renjo la uf gokio und über da cho la uf lobuche... det simer den, wieder ufem highway, uf da kala pathar und ins basecamp.

Immer schön im uhrzeigersinn uma

Gegaverkehr vur deftigara art. Do stoht jeda schön brav ufd sita.

In da höhara laga isches denn grad a chli küahler worda. Am obed isch ma do gära an ofa ghokt. Das isch übrigens d kuchi im einta gasthus gsi. Uf dem ofa het s locker für as duzend lüt kocht.

Ufem weg richtig renjo la. Abmarschzyt 5.30 uhr.

An richtiga himalaya pass, mit a hufa farbiga fähnli

Dia gewaltig ussicht richtig everest. Miar sind mi anara gruppa träger doba gsi. Wo mr gfrogt hend, wela dass denn do gnau dr everest sei, hends zersch au kai rot gwüsst, denn isch d diskussion losganga, ma het sich den uf dr grosdi ir mitti geinigt :-)

Aifach wells so schön isch, nomol

Uf da högschti oba aba luaga...

Akunft in gokjo

Dr Cho oyu

Ufem cho la. As narra puff. Und alli träger in schlarpa oder bestafalls turnschua... Miar sind den bald amol witer.

Dr kala pathar (dr hügel im vordergrund nit dr schön berg im hintergrund, das isch dr pumo ri) u d ds basecamp gebend a schöni ussicht uf everest,  nuptse und co susch sinds aber üserer meinig noch chli tourifallana. Ds eina isch nit würkli an berg und ds andara nit würkli z basecamp.

D usicht vum chukung ri mit lothse südwand, island peak, makalu...

Isch chli gemein wenn ma uf 5500müm in a wand luagt wo 3000m witer ufa got.

Dr ama dablam isch sicher eina vu da schönara berga

Noch fasch ama monat unterwegs hemer gfunda miar hegend langsam gnuag und d plän zum abalaufa begraba. Miar hend gfunda miar luagend amol für as flugticket in lukla. Flüger sind alli voll gsi und a hufa lüt am warta. Miar sind trotzem noch nit amol ara stund in lukla ir luft gsi. Edel per heli simer uf kathmandu zruck. Und das zum glicha pris wia ma normalerwis fürs flugi zahlt...

Everest trek teil 1: jiri - lukla, numbur cheese circuit

Miar hend üsara everest trek in jiri, am letschta mit bus einigermassa ereichbara ort, gstartet. In shivalaya hemer a wüchigi zuasatzrundi mit zelt gmacht, dr sogenannti numbur cheese circuit (wells det a hufa alpa het, wos yak käs machend - dia sind aber alli schu verlassa gsi). 

Start in jiri

Malerischi sherpa dörfli inara gegend wo üs recht heimisch vorkhu isch

Ds letschta gasthus und dia letscht möglichkeit zum nomol richtig essa bevors den ind berga isch. Vu do weg hemer 5 täg lang kai mensch meh atroffa...

Am obed hets ghaglet, am morga hemer den immerno glattiis vorem zelt kha. Nit würkli amächalig zum usem schlofsack khu.

Ir sunna hets den schu anders usgseh.

D unterkünft sind recht eifach gsi. Aber wenigstens a tach obem kopf. Am nomitag am 3 isches nämli dia erschta paar täg zuaverlässig go regna, schneia, hagla khu.

Bi dera ussicht nememer au a eifachi unterkunft. Das isch uf über 4000müm, im hintergrund dr pass womer den drüber hend müassa. Und immerno wit und breit kai mensch.

Wenig surstoff, a schwera rucksack und trotzdem no lächla :-)

Ds wetter het den immer übler usgseh...

... bald hets den richtig agfanga schneia. Miar sind grad no rechtzitig über da pass und bald in dia nägscht hütta khu. 

A chli witer duna isches den in dschungel ganga

... und zwar so richtig!

Bis mr den wieder ufs erschta sherpadörfli troffa sind.

In tüfa laga wachst do alles. Do hets banana am wegrand gha

A herzigs gasthus mit unterhaltig. 

An nepalesischa supermarkt

Dr erschti blick uf dia würkli grossa berga. Ganz ganz links luagt no dr everest usa.

Kriasibäum in voller blüati und das im oktober.

Malerischi dörfli ufem weg noch lukla

Nebed a hufa bluama sind do au alli möglicha frücht gwachsa. Miar hend das usgnützt und hend nomol vitaminli tankt bevors den ab ind berga isch.

Wohrschindli heti si uf schoggi oder zückerli ghofft, isch aber z schüch gsi zum froga...