muang khua - dien bien phu - sapa

Womer in muang khua as busticket uf vietnam hend wela loesa, simer quasi usglacht worda. In vietnam laufi fuer dia naegschta 5 taeg nut - wega neujohr. Dae bus fahri nit. Dass neujohr isch hemmer gwuesst, dass das aber so lang got nit. Miar hend den mit andara wo steckabliba sind a privats buesli ueber d grenza uf dien bien phu (vorallem bekannt wil det d viatnamesa d franzosa usagschmissa hend) organisiart. Das ganza isch nit so eifach gsi, wil i dem kaff quasi niamert englisch het koenna und bis am schluss nit sicher gsi isch ob vilicht nit doch no an bus fahrt...

Miar sind den guat ueber d grenza khu. Do isch z puff aber witerganga. Eigentlich erwartigsgemaess sind ali am feschta, familia am bsuacha und niamert wil schaffa. Busticket organisiara isch schwierig bis unmoeglich. D busfahrer fahrend nu grad wens luscht und gnuag gaescht zema hend uf eigni rechnig. Englisch kann wiederamol niamert. Miar schaffends as buesli mit a hufa iheimischa zaema z entara und koemnd schlussendlich guat uf sapa. Quasi z grindelwald vu suedostasia - mit doppelt soviel asiata. Aber in grandioser landschaft, mit richtiga 3000er. Und miar hend wiederamol as richtigs edels hotelzimmer verwuetscht...

 D restaurantszena in dien bien phu isch nit so gewaltig gsi. Dia alt frau wo uesi bstellig ufgnu het het nur zeichasproch verstanda. Wo i dr kolleg wo mit ues unterwegs gsi isch gfrog han ob er sich bewusst sei, dass er jetz grad ".. chien .." bstellt hei isches lustig worda. Mit wuff wuff und kopfschuetla het er dr arma frau versuacht z klar macha was er nit will. Miar als vegie hend ues kaputglacht. Was er schlussendlich kriagt het isch unklar gsi...