yangshuo

Miar sind in china! Und denn no ir schönschta gegend vu china. Mindestens sägend das d chinesa. Entsprechend viel chinesischi touris hets do. Vorallem wenn mas schafft zum am 1. Mai do azkuh. Isch natürli der firtig do. Dia goldig wucha nennend sis. Wil ganz china dia wucha feria het. Isch aber lustig zum luaga. Und mit a chli geduld und a hufa nerva macht au z velofahra zu da kletterfelsa spass. Verkehrsregla kennends keini, oder si werdend eifach ignoriart. As isch ei krüz und quer vu alna möglicha fahrzüg, schiabekära und fuasgänger. Alles hupet und bewegt sich irgendwia, meistens öpa im schritttempo, vorwärts. Und miar als wisi touris, mit grossem rucksack und ufem velo sind di attraktion, gfötelet vu alna sita...

D landschaft um yangshuo isch aber würkli gewaltig. Wia usem bilderbuach und an traum für kletterer. Miar sind schu zwei täg am klettara gsi und hend hüt ruhetag. Üsi kletterform muas noch 6 wucha strand und stadt zersch wieder ufbaut werda...

Blogga us china, hinter dr grossa mura, isch übrigens nit ganz eifach. Üsara blog isch schinbar a gfohr für da staat. Zuagriff blockiart. Han müassa a vpn verbindig irichta zum das ganza umgoh. Wenn iar den mol nüt meh vu üs ghöra söttend, funktioniarts den vilicht eifach nüm...